Mukura VS yanyagiye Kirehe FC, umukino wa Police FC na Etincelles FC wasubitswe uzakinirwa kuri sitade ya Kigali

Ikipe ya Mukura Victory Sport yanyagiye Kirehe FC ibitego 4-0 mu mukino w’umunsi wa 16 wa shampiyona waberaga kuri sitade Huye. Rachid Mutebi yatsinzemo ibitego bibiri wenyine.

Ni umukino ikipe ya Mukura VS yakinaga nyuma yo gusezerera AS Kigali mu gikombe cy’Amahoro 2018. Rachid Mutebi yatsinzemo ibitego bibiri (2). Ibindi bitsindwa na Hakizimana Kevin bita Pastore na Ndayishimiye Christophe.

Undi mukino waberaga mu ntara y’Amajyepfo, ikipe ya Bugesera FC yatsinze Amagaju FC igitego 1-0, igitego cyatsinzwe na Mubumbyi Bernabe wari wagarutse mu bakinnyi 11 nyuma yo kuva i Burayi. Ikipe ya Kiyovu Sport yaburiye amanota atatu mu ntara y’Amajyaruguru itsinzwe na Musanze Fc ibitego 2-1 mu mukino Ndoli Jean Claude yabonyemo ikarita itukura.

Kiyovu Sport ni yo yafunguye amazamu ku gitego cyatsinzwe na Nganou Alex Russel mbere yuko Bokota Labama yishyura anongeramo ikindi. Ikipe ya Espoir FC yaguye miswi na Gicumbi FC banganya igitego 1-1.

Umukino wa Police FC na Etincelles FC ntiwabaye kubera imvura yaguye bigatuma ikibuga cya Kicukiro kijyamo amazi. Uyu mukino uzakinwa Kuwa Mbere tariki 16 Mata 2018 ku kibuga cya Sitade ya Kigali.

Ibi biratuma ikipe ya Police FC ikora imyitozo kuri iki Cyumweru tariki 15 Mata 2018 kuri sitade ya Kigali saa mbili n’igice z’igitondo (08h30’) kugira ngo bazahakirire Etincelles FC yo isanzwe ikorera ku kibuga cya sitade Umuganda giteye kimwe n’icya sitade ya Kigali.

Abajijwe impamvu uyu mukino wajyanwe kuri sitade ya Kigali nyamara nta kindi gikorwa giteganyijwe ku kibuga cya Kicukiro, Seninga Innocent umutoza mukuru wa Police FC yabwiye INYARWANDA ko bahisemo sitade ya Kigali bateganya ko imvura yazongera kugwa ikibuga kikaba cyakuzura amazi.

“Byabaye ngombwa ko tuzakinira kuri sitade ya Kigali/Nyamirambo muri gahunda yo kwirinda ko ikibuga cya Kicukiro cyazongera kuzura amazi. Bityo rero kuri iki Cyumweru turakora imyitozo mu gitondo saa mbili n’igice (08h30’) tubone gusubira mu mwiherero urarayo (Residential Camp)”. Seninga Innocent

Dore uko umunsi wa 16 uteye:

Kuwa Gatandatu tariki 14 Mata 2018

-Espoir FC 1-1 Gicumbi Fc

-Mukura VS 4-0 Kirehe FC

-Amagaju FC 0-1 Bugesera FC

-Musanze Fc 2-1 SC Kiyovu

 Ku Cyumweru tariki 15 Mata 2018

Sunrise FC vs APR FC (Nyagatare, 15h30’)

-Marines Fc vs Miroplast Fc (Stade Umuganda,15h30’)

Kuwa Mbere tariki 16 Mata 2018

-Police FC vs Etincelles Fc (Stade de Kigali, 15h30’)

Facebook Comments

Comments

comments

Leave a Reply

Your email address will not be published. Required fields are marked *