Madamu Jeannette Kagame ari kumwe n’abandi banyamuryango ba Imbuto Foundation yifatanyije n’abatuye i Kigali mu munsi wahariwe siporo rusange uzwi nka ‘Car Free Day’.

Madamu Jeannette Kagame ari kumwe n’abandi banyamuryango ba Imbuto Foundation yifatanyije n’abatuye i Kigali mu munsi wahariwe siporo rusange uzwi nka ‘Car Free Day’.

Buri Cyumweru cya mbere n’icya gatatu cy’ukwezi, abantu b’ingeri zose barenga igihumbi bo mu bice bitandukanye by’Umujyi wa Kigali bahurira muri siporo ku kibuga cy’Ikigo cy’Igihugu cy’Imisoro n’Amahoro, bagakora imyitozo ngororangingo itandukanye.

Mu gitondo cyo kuri iki Cyumweru tariki 15 Nyakanga 2018, Madamu Jeannette Kagame ni umwe mu bifatanyije n’abaturage benshi bitabiriye Car Free Day, bakorana imyitozo ngororamubiri.

Tariki 3 Ukuboza 2017, Perezida Kagame yifatanyije n’abatuye Umujyi wa Kigali muri siporo ngarukakwezi, asaba ko yakongererwa amasaha kugira ngo irusheho gutanga umusanzu mu gutuma Abanyarwanda bagira ubuzima bwiza.

Nyuma yaho ingengabihe yayo yahise ihindurwa iva ku kuba umunsi umwe mu kwezi ahubwo iba ibiri.

Minisitiri w’Ubuzima, Dr. Diane Gashumba, yasabye abanyarwanda ko gukora siporo bikwiye kuba umuco ntibayikore kuri iyi minsi ibiri iba yarateganyijwe gusa mu kwezi.

Yabwiye abari bitabiriye iyi siporo ko kuva mu 2016 yatangira abantu barenga ibihumbi bitandatu bamaze kwitabira igikorwa kiberamo cyo kwipimisha indwara zitandura. Muri bo, 70% ni ab’igitsina gabo.

Abagore byagaragaye ko bafite ibibazo by’umubyibuho ukabije naho abagabo benshi bigaragara ko bashobora kugira ikibazo cy’umuvuduko ukabije w’amaraso.

Ni mu gihe kandi abari hejuru y’imyaka 40 basanganywe ibibazo by’umubyibuho ukabije ndetse n’umuvuduko w’amaraso.

Mu nama zatanzwe, abagore bakanguriwe kwirinda ibyatuma bagira umubyibuho ukabije kuko ku kigero cya 65% ubagiraho ingaruka zikomeye zirimo n’ibibazo by’umutima.

Yanavuze ko serivisi zo kwisuzumisha izi ndwara zitandura zitangwa ku bigo nderabuzima byose ku kiguzi cyishingirwa n’ubwisungane mu kwivuza, Mutuelle de Santé.

Car Free Day ni gahunda yatangiye muri Gicurasi 2016 igamije gushishikariza abatuye Umujyi wa Kigali umuco wo gukora siporo no kubiborohereza no gushishikariza abaturage kwirinda indwara zitandura.

Iki gikorwa kandi kiri muri gahunda yo kwigisha no kumenyereza abantu ko imihanda itubakirwa imodoka gusa, ahubwo ko yubakirwa abantu. Ibi bigafasha mu kugabanya ubucucike bw’imodoka, ndetse n’ihumanywa ry’ikirere.

Facebook Comments

Comments

comments

Leave a Reply

Your email address will not be published. Required fields are marked *