Amaranye imyaka 24 ubuhiri, inkota n’icumu byari kumwica

Musanze – Mukagakwaya Julienne atuye mu mujyi wa Musanze, umurenge wa Muhoza, yarokotse Jenoside yakorewe abatutsi mu 1994 ariko kuva ubwo aracyabitse ubuhiri, inkota n’icumu interahamwe zari kumwicisha mbere y’uko arokorwa n’ingabo z’inkotanyi.

Mukagakwaya w’imyaka 61 yarahigwaga ngo yicwe ariko umugabo we atari mu bahigwa, yarihishe…haba ubwo yamaze amezi mu rufunzo.
Ati “rimwe babonye batari kunsanga hano mu rugo babwira umugabo wanjye ngo nintaha anyiyicire hanyuma abashyire igihanga cyanjye, bamusigira uburiri, inkota n’icumu, ari byo ibi ubona.”
Ntibyahereye mu 1994 kuko Mukagakwaya avuga ko aho avuka mu cyari Perefegitura ya Kibuye kuva akiri muto, ngo nubwo yari umuhanga mw’ishuri ntibyamushobokeye ko akomeza ngo arangize ayisumbuye.

Ati “Hari umudepite wari unzi ko buri gihe nabaga uwa mbere, rwose pe niwe wansabiye ko najya muri secondaire. Narayize tugeze mu mwaka wa gatatu, mu 1973 haba imvururu abatutsi baricwa, icyo gihe ntibaretse ngo nkomeze nige.”

Mukagakwaya yibuka ko ngo kuva mu 1990 uko inkotanyi zateraga abatutsi bicwaga.

Ati “Hari ubwo twabwiwe ngo inyenzi zateye u Rwanda zinyuze mu birunga ariko ziraneshwa zisubirayo. Icyo gihe iwacu ku Kibuye abantu barapfuye bababwira ngo ni ibyitso, ndetse mu Bigogwe, Mukingo na Kinigi hapfuye benshi cyane. Batwitaga inzoka ndetse baranabiririmbaga.”

Avuga ko hari umugabo wo muri Nyakinama [ubu ni mu murenge wa Nkotsi, mu karere ka Musanze wamufashije akamujyanana n’umugore we n’abana bakajyana iwe mu rugo, mu nzira aho banyuraga kuri za bariyeri (barrières) ngo akavuga ko ari umugore we wa kabiri.

Nyuma ngo interahamwe zaje kumenya iyo ari zipanga kumusangayo, ababimenye agaruka mu mugi, abisikana n’abari baje kumwica.

Ati “Nageze aha mu rugo, nsanga bakimpiga mpungira kwa nyirasenge w’umugabo wanjye, akana nari mpetse kaje gusohoka hanze, abakabonye bati “dore wasanga wa mututsikazi wo mu mugi ari aha dore umwana we.” nasubiye mu rugo umugabo ati byakaze, mpita njya mu gishanga muri Mpenge, aho njye n’umwana nari mpetse twamaze amezi hafi atatu, umugabo anzanira ibyo kurya, bigera naho binanira nkajya nywa ‘ubushera’ gusa yabaga yanzaniye kuko niwe wenyine wari azi aho ndi.”

Akomeza avuga ko muri icyo gihe ari muri Mpenge, umugabo yabwiraga abantu ko yahungiye iwabo ku Kibuye, ko ahubwo ashobora kuba yaranapfuye.

Ati : “Kubera ko umugabo yacuruzaga, yagiye i Kigali nanjye nguma muri icyo gishanga, aje nanjye ndaza, hanyuma interahamwe zikeka ko twazanye tuvuye i Kigali. Zaraje nyura mu gikari hari ishyamba nirukankana umwana nsubira mu gishanga ”

Mukagakwaya avuga ko icyo gihe bakubise umugabo we bikomeye, hanyuma abandi bati; uyu mugabo ni umuhutu mumwishe mwaba mumuhoye ubusa, ahubwo najye gushaka umugore aho ari, amuzane abe ari we wicwa.’

Babyumvikana gutyo, bamusigira inkota, ubuhiri n’icumu babishyira mu mbuga, basiga bamubwiye ngo :”Ntabwo tugishaka kumubona wowe umwiyicire n’ibi tuguhaye, hanyuma uzane igihanga cye.”

Ibi byose byabaga mbere ‘y’indege’

Ibyo byose ngo byabaye mbere ho gato y’uko indege y’uwari Perezida Juvénal Habyarimana ihanurwa, byakorwaga n’interahamwe zari zaratorejwe ku Musanze na Nyakinama, ngo zari zinafite imbunda n’amapeti kuko hari abitwaga ba Liyetona (Lieutenant).

Mu muryango aho Mukagakwaya avuka, ngo bamwe mu b’iwabo bishwe kera babaziza ko ari abatutsi, ngo ni we wenyine wasigaye, abandi bose biciwe muri kiliziya i Nyange, abandi bake bakiriho ni abisengeneza be bari barasanze FPR muri Uganda n’abari i Burundi.

Ibi yari kwicishwa ngo aho yabijyana ni mu rwibutso…

Kuba akibitse izi ntwaro gakondo basigiye umugabo we ngo amice hari ababibona nk’ihungabana ariko kuri we ngo ni urwibutso rw’ibyamubayeho, kandi ni ibyerekana ko Jenoside yateguwe itatewe n’ihanurwa ry’indege nk’uko hari ababivuga kuko ibyamubayeho byabaga mbere yayo.

Kuba akibitse izi ntwaro gakondo mu rugo ngo ni uko yari atarabona aho yizeye abibika, ariko ngo urwibutso rugiye kubakwa i Busogo nirwuzura azabijyanayo bibishyire mu mateka ya Jenoside kugira ngo atazibagirana.

Yitwaga ‘inyenzi’ ariko kandi na we azitinya…

Mu gushishikariza abahutu kumara abatutsi habayeho ubukangurambaga bwo kuvuga ko Inkotanyi abateguraga Jenoside bitaga inyenzi ari abantu babi kandi bica.

Mukagakwaya nubwo yahigwaga yitwa ‘inyenzi’ cyangwa ikitso cyazo, nawe ubwe ahubwo yarazitinyaga kubera izo ‘propaganda’.

Avuga ko yigeze kumva ubuhamya bw’umugore kuri radiyo, avuga ko ‘inyenzi’ zaje zikamubwira ngo asekure umwana we. Ngo nawe atangira kwibaza no kumva ubugome bw’abo bantu.

Umunsi umwe Inkotanyi zimaze gufata ibice byo mu Majyaruguru, ari nabwo zafunguye gereza ya Ruhengeri, ba bisengeneza be ngo bamugezeho mu rugo bari kumwe n’abandi bantu, yahise yibuka iby’ubwo buhamya bwatambutse bw’umugore wo muri Butaro, na we ahita ahisha uruhinja rwe munsi y’uburiri, bamubajije aho umwana ari, ati namuhishe… Bati humura ni ukutubeshyera, amukuramo barumirwa.

Ngo abandi basirikari b’Inkotanyi baraje bamuhungishiriza mu gice bari barafashe i Nyamugari [ubu ni mu Karere ka Burera, mu murenge wa Nemba] ari nabwo ngo yabonye urukundo Inkotanyi zikunda abanyarwanda kuko aho yanyujijwe yasanze hari n’abandi batabawe.

Kubera iriya myumvire yari yarabibwe muri rubanda biciye mu itangazamakuru Mukagakwaya avuga ko byageze mu 1995 abaturage bagitinya Inkotanyi ariko we kuko yari yarazimenye yabwiraga abantu ko ari abanyarwanda kandi bakunda abanyarwanda bagenzi babo n’igihugu cyabo.

Ubu yishimira ko atuye mu gihugu gitekanye kiri gutera imbere. Ati “kuva mu bwana bwanjye nibwo nabaho mu Rwanda rufite umutekano usesuye nta muntu n’umwe uhezwa.” Ibi ngo kubera urugamba rwo kwibohora.

SRC: Umuseke

Facebook Comments

Comments

comments

Leave a Reply

Your email address will not be published. Required fields are marked *